हेटौंडा । बागमती प्रदेशमा हालै सम्पन्न मतदाता नामावली संकलन कार्यक्रममा दुई लाखभन्दा बढी नागरिकले आफ्नो नाम दर्ता गराएका छन्। प्रदेश निर्वाचन कार्यालय हेटौंडाका अनुसार असोज १० गतेदेखि मंसिर ५ गतेसम्म संचालन भएको नामावली संकलन अभियानमार्फत २ लाख ४ हजार ९ सय ५ जनाले राष्ट्रिय परिचयपत्र र विभिन्न जिल्ला निर्वाचन कार्यालयमा गरिएको बायोमेट्रिक प्रणालीमार्फत दर्ता गरेका हुन्।
सूचना अधिकारी ताराप्रसाद आचार्यका अनुसार ९९ हजार ३ सय ३४ जनाले बायोमेट्रिक प्रक्रिया पूरा गरेका छन्, जसमध्ये ५६ हजार ३ सय ६४ पुरुष र ४४ हजार ८० महिला रहेका छन्। दर्ता प्रक्रियामा युवाको सक्रिय सहभागिता विशेष रूपमा देखिएको निर्वाचन कार्यालयले जनाएको छ।
सबैभन्दा धेरै नयाँ मतदाता काठमाडौँ जिल्लामा दर्ता भएका छन्, जहाँ ६२ हजार ४ सय १ जनाले नामावलीमा नाम थपेका छन्। त्यस्तै ललितपुरमा २६ हजार ८ सय ११, चितवनमा २२ हजार २ सय ६३, भक्तपुरमा २० हजार १ सय ७७ जना दर्ता भएका छन्। बाँकी जिल्लामा पनि उल्लेखनीय संख्यामा नयाँ मतदाता थपिएका छन्—मकवानपुरमा १४ हजार ६ सय ३, काभ्रेमा १४ हजार ३ सय २९, सिन्धुलीमा ७ हजार ३९, रामेछापमा ६ हजार १ सय २, दोलखामा ६ हजार ६ सय ८७, सिन्धुपाल्चोकमा ६ हजार ९ सय ३९, धादिङमा ८ हजार ४ सय ३१, नुवाकोटमा ८ हजार १ सय ८९, र रसुवामा ९ सय ३४ जना।
असोज १० गतेसम्मको तथ्यांकअनुसार बागमती प्रदेशमा ३४ लाख ७१ हजार ७ सय ९२ मतदाता रहेका छन्।
निर्वाचन आयोगले मंसिर २० गतेदेखि पुस १५ गतेसम्म मतदाता नामावली अद्यावधिक गर्ने अर्को चरण संचालन गर्ने जनाएको छ। मंसिर २० गते प्रारम्भिक नामावली प्रकाशित गरिनेछ भने मंसिर २१ देखि २७ गतेसम्म त्रुटि सच्याउने तथा झुठा विवरणविरुद्ध उजुरी दिने समय तोकिएको छ। आवश्यक छानबिन र निर्णयपछि पुस १५ गते अन्तिम नामावली सार्वजनिक गरिनेछ।
प्रदेशभरि युवाहरूले उत्साहपूर्वक दर्ता कार्यक्रममा सहभागिता जनाएकाले आगामी निर्वाचनमा युवा मतदाताको प्रभाव झनै निर्णायक हुने संकेत विश्लेषकहरूले व्यक्त गरेका छन्।
