हेटौंडा । हेटौंडा उपमहानगरपालिका–१०, टिसिएन रोडस्थित बजाज शोरुम अगाडि एक युवकमाथि कुटपिट भएको छ। कुटपिटमा परि पर्वत जिल्ला, मोती गाउँपालिका–२ का ३५ वर्षीय सरोज लामिछाने गम्भीर घाइते भएका छन्।
प्रहरीका अनुसार, उनलाई १० गते बिहान करिब ८ बजे बेहोस अवस्थामा फेला पारिएको थियो। हेटौंडा अस्पतालमा उपचारपछि होस आएपछि घाइते लामिछानेले आफ्नो परिचय खुलाएका थिए।
घटनाको अनुसन्धानका क्रममा प्रहरीले वरिपरिका सिसी क्यामेराको फुटेज हेर्दा तीन जनाको संलग्नता पत्ता लगाएको छ।
प्रहरीले चितवनको कालिका नगरपालिका बस्ने १७ वर्षीय सुवास आलेमगर र तनहुँ भानु नगरपालिका–४ का १६ वर्षीय आर्जेन तामाङलाई नियन्त्रणमा लिएको छ। उनीहरूविरुद्ध अभद्र व्यवहार मुद्दा दर्ता गरी मकवानपुर जिल्ला अदालतबाट म्याद थप गरी अनुसन्धान भइरहेको प्रहरीले जनाएको छ।
यसै घटनामा संलग्न मकवानपुर भिमफेदी–२ की १७ वर्षीया सन्ध्या पाख्रिन फरार रहेको र उनको खोजी कार्य भइरहेको प्रहरी नायब उपरीक्षक पुष्कर बोगटीले जानकारी दिनुभयो ।
प्रहरीका अनुसार, कार्तिक १० गते बिहान करिब ४ बजे ती दुई किशोर र एक किशोरीले मादक पदार्थ सेवनपछि लामिछानेमाथि कुटपिट गरेका थिए।
घाइतेको हेटौंडा अस्पतालमा उपचार भएर अवस्था सामान्य रहेको प्रहरीले जनाएको छ ।
