हेटौंडा । हेटौंडा जेसीजले जेसिज सप्ताह–२०२५ को अवसरमा विविध सामाजिक, प्रतिस्पर्धात्मक र जनचेतनामूलक कार्यक्रमहरू आयोजना गर्ने भएको छ।
आइतबार आयोजित पत्रकार सम्मेलनमा हेटौंडा जेसीजका अध्यक्ष पंकज दास बानियाँले कात्तिक १८ गतेदेखि २२ गतेसम्म सञ्चालन हुने सप्ताहव्यापी कार्यक्रमहरूको विवरण सार्वजनिक गरे।
उनका अनुसार सप्ताहको पहिलो दिन कात्तिक १८ गते) बिहान ७ बजे हुप्रचौरमा रक्तदान कार्यक्रम आयोजना गरिनेछ। सोही दिन बिहान ८ः३० बजे स्लो बाइक प्रतियोगिता समेत हुने बताइएको छ।
कात्तिक १९ गते बिहान ७ बजे अन्तर–जेसिज वक्तृत्वकला प्रतियोगिता हुने छ भने दिउँसो २ बजे भूटनदेवी माध्यमिक विद्यालयमा साइबर सचेतना कार्यक्रम सञ्चालन गरिनेछ।
त्यसैगरी, कात्तिक २० गते विद्यालयस्तरीय हाजिरी–जवाफ प्रतियोगिता जेसीज सचिवालयमा आयोजना गरिनेछ, जसमा कक्षा १० सम्मका विद्यार्थीहरूले सहभागिता जनाउनेछन्।
कात्तिक २१ गते मकवानपुरगढी–६, गुरदाङस्थित अति विपन्न एक परिवारलाई खाद्यान्न तथा लत्ताकपडा वितरण गरिनेछ।
सप्ताहको अन्तिम दिन कात्तिक २२ गते समापन समारोहका क्रममा उत्कृष्ट सदस्य तथा उत्कृष्ट कार्यक्रम संयोजकलाई सम्मान तथा अवार्ड वितरण गरिने अध्यक्ष दासले जानकारी दिए।
