हेटौंडा । मकवानपुर प्रहरीले करिब १ ग्राम ५६० मिलिग्राम खैरो हेरोइन सहित दुई जनालाई पक्राउ गरेको छ।
जिल्ला प्रहरी कार्यालय मकवानपुरका अनुसार, शुक्रबार साँझ करिब ५ बजे प्रहरी चौकी रातोमाटेबाट खटिएको टोलीले हेटौंडा–१५ रातोमाटे चेकपोस्टमा पूर्व–पश्चिम राजमार्ग हुँदै गुडिरहेका सवारी साधन जाँच गर्ने क्रममा लागुऔषध बरामद गरेको हो।
बा.प्र. ०६–००१ ज. ०१९१ नम्बरको EV गाडी बिरगंजबाट हेटौंडा आउँदै गरेको अवस्थामा रोकिएको थियो। सोही गाडीमा सवार रामपुर नगरपालिका–८ का २३ वर्षीय स्मारिका उर्फ मनिष ठकुरी, र कास्की नगरपालिका–५ का २५ वर्षीय रचना उर्फ सन्जित नेपाली
माथि शंका लागेपछि रितपूर्वक खानतलासी गर्दा उक्त मादक पदार्थ फेला परेको प्रहरीले जनाएको छ ।
उनीहरूले लुकाई–छिपाई ल्याएको अवस्थामा लागुऔषध भेटिएपछि दुवैजनालाई नियन्त्रणमा लिइएको छ। पक्राउ परेका दुवैलाई मकवानपुर जिल्ला अदालत हेटौंडाबाट म्याद अनुमति गरी थप अनुसन्धान जारी रहेको प्रहरीले जनाएको छ।
