हेटौंडा । हेटौंडा उपमहानगरपालिकामा नगरस्तरीय परियोजना परामर्श समितिको बैठक नगर प्रमुख मिना कुमारी लामाको अध्यक्षतामा सम्पन्न भएको छ।
बैठकमा नगर प्रमुख लामाले महिला तथा बालबालिकाको संरक्षण र सशक्तिकरणलाई स्थानीय सरकारले उच्च प्राथमिकतामा राखेको बताइन्। उनले मानव बेचबिखनको जोखिममा रहेका, विद्यालय छाडेका तथा जबरजस्ती श्रम र यौन हिंसामा परेका महिला तथा किशोरीहरूको उद्धार, संरक्षण, सीपमूलक तालिम र पुनर्स्थापनाका कार्यक्रम सञ्चालन गरिने जानकारी दिइन्।
माइती नेपालकी संयोजक माया लामाले कार्यक्रमको उद्देश्यबारे जानकारी दिँदै पीडित तथा जोखिममा रहेका समूहको बौद्धिक क्षमता विकास गरी हिंसाविरुद्ध अभियानकर्ताको रूपमा स्थापित गर्ने र सरकारी–गैरसरकारी निकायसँग समन्वय गरी संयुक्त रूपमा काम गर्ने लक्ष्य रहेको बताइन्। विद्यालय तहमा पनि मानव बेचबिखन, जबरजस्ती श्रम र यौन हिंसाबारे सचेतना अभिवृद्धि गर्ने कार्यक्रम सञ्चालन गरिने उनले उल्लेख गरिन्।
प्रस्तुतीकरणका क्रममा उनले कार्यक्रमका मुख्य क्रियाकलाप, लक्षित समूह, अपेक्षित उपलब्धि तथा रोजगारी सिर्जनासम्बन्धी विषयमा जानकारी दिँदै आवश्यक साझेदारी र पालना गर्नुपर्ने मापदण्डबारे प्रकाश पारिन्।
माया लामाका अनुसार पछिल्लो समय मसाज सेन्टरहरूबाट बालिकाहरूको उद्धार हुने क्रम बढ्दो छ भने यौन व्यवसायमा किशोरीहरूको संलग्नता पनि देखिन थालेको छ, जसले गम्भीर ध्यान आवश्यक रहेको संकेत गर्छ।
बैठकमा नगरपालिका तथा विभिन्न सरकारी–गैरसरकारी निकायका प्रतिनिधिहरूको सहभागिता थियो।
