मकवानपुरमा फागुन २१ का लागि तय गरिएको निर्वाचनअन्तर्गत आज बिहान ७ बजेदेखि मतदान सुरु भएको छ। जिल्लाका दुईवटा निर्वाचन क्षेत्रमा मतदान शान्तिपूर्ण रूपमा सुरु भएको हो।
निर्वाचनका लागि मकवानपुरभर १०२ वडामा १६७ मतदानस्थल र ३७४ मतदान केन्द्र तोकिएका छन्। जिल्लामा कुल ३ लाख १५ हजार ३३४ मतदाता रहेका छन्। तीमध्ये मकवानपुर–१ मा १ लाख ५८ हजार ४३४ र मकवानपुर–२ मा १ लाख ५६ हजार ८९९ मतदाता रहेका छन्।
निर्वाचन व्यवस्थापनका लागि जिल्लामा दुईवटा अस्थायी मतदानस्थल पनि राखिएको छ। भीमफेदी कारागार र जिल्ला प्रशासन कार्यालय मकवानपुरमा एक–एक मतदानस्थल स्थापना गरिएको छ। भीमफेदी कारागारमा महिला र पुरुष गरी ९ सय ९५ कैदीबन्दी भए पनि मतदाता नामावलीमा भने ७५ जनाको मात्रै नाम रहेको छ। तीमध्ये ३ जना महिला र ७२ जना पुरुष मतदाता रहेका छन्।
जिल्लामा रहेका मतदानस्थलमध्ये सुरक्षा संवेदनशीलताका आधारमा १९ मतदानस्थललाई अति संवेदनशील, ६० मतदानस्थललाई संवेदनशील र ८८ मतदानस्थललाई सामान्य श्रेणीमा राखिएको छ। जिल्ला सुरक्षा समितिले १० स्थानीय तहमध्ये ६ स्थानीय तहका मतदानस्थललाई अति संवेदनशील सूचीमा समावेश गरेको हो।
अति संवेदनशील सूचीमा सबैभन्दा धेरै बकैया गाउँपालिकाका ५ मतदानस्थल र ७ मतदान केन्द्र रहेका छन्। यस्तै राक्सिराङ गाउँपालिकामा ६ मतदानस्थल, बागमती गाउँपालिकामा ५ मतदानस्थल, भीमफेदी गाउँपालिकामा १ मतदानस्थल, मनहरी गाउँपालिकामा १ मतदानस्थल तथा कैलाश गाउँपालिकामा १ मतदानस्थल अति संवेदनशील सूचीमा राखिएको छ।
यसैगरी जिल्लाका ६० मतदानस्थल र १ सय २३ मतदान केन्द्र संवेदनशील सूचीमा परेका छन्। तीमध्ये हेटौँडा उपमहानगरपालिका, थाहा नगरपालिका, राक्सिराङ, बकैया, बागमती, मकवानपुरगढी, इन्द्रसरोवर, भीमफेदी, कैलाश र मनहरीका विभिन्न मतदानस्थलहरू संवेदनशील मानिएका छन्।
मकवानपुर–१ नम्बर निर्वाचन क्षेत्रमा ६२ मतदानस्थलमा १७८ मतदान केन्द्र रहेका छन् भने मकवानपुर–२ नम्बर निर्वाचन क्षेत्रमा १०५ मतदानस्थलमा १९६ मतदान केन्द्र रहेका छन्।
