मकवानपुर । वानपुरको भीमफेदीस्थित क्षेत्रीय कारागारबाट सोमबार राति २६० जना कैदी फरार भएका छन्।
कारागार प्रमुख सुवास पौडेलका अनुसार राति १२:५५ बजे ‘क’ ब्लकमा रहेका कैदीबन्दीहरूले तीन वटा गेट फुटाएर भाग्ने प्रयास गरेका थिए। त्यसपछि पश्चिमतर्फको पर्खाल भत्काएर २६० जना कैदी बाहिर निस्किएका हुन्। सो ब्लकमा ५ सयभन्दा बढी कैदी थिए।
भागेका मध्ये करिब २३० जनालाई सुरक्षाकर्मीहरूले नियन्त्रणमा लिई पुनः कारागार फर्काइएको छ।
भाग्ने क्रममा सुरक्षाकर्मी र कैदीबन्दीबीच झन्डै ४ घण्टासम्म झडप भएको थियो। सेनाले स्थिति नियन्त्रणमा लिन २०० राउन्ड हवाई फायर गरेको कारागार प्रमुख पौडेलले जानकारी दिनुभयो । सशस्त्र प्रहरीले पनि २ राउन्ड हवाई फायर र अश्रुग्यास प्रयोग गरेको थियो।
झडपका क्रममा कारागारको गाडी लिएर भाग्ने प्रयास गर्दा टायरमा गोली चलाउँदा दुई कैदी घाइते भएका छन्। उनीहरूको हेटौंडा अस्पतालमा उपचार भइरहेको छ।
कैदीबन्दीहरूले कारागारभित्र तोडफोड र आगजनीसमेत गरेका छन्। यद्यपि, कारागारको अर्को ‘ख’ ब्लक भने सुरक्षित रहेको जनाइएको छ।
